Paruwase Ryakabamba yarahimbaje mu kanyamuneza n'ubukengurutsi Yubile y'imyaka 25

Yubire y’imyaka 25 ya Paruwasi RYAKABAMBA
Insiguro ya Musenyeri Joriji Bizimana, Umwungere wa Diyoseze ya Ngozi

Ibisomwa: Lv 25, 1.8-13 ; Rm 5, 5-11 ; Lc 4, 16-21

Kuri uyu musi w’igenekerezo rya 31 Rusama 2025, ni ho hategekanijwe ko duhimbaza Yubire y’imyaka mirongo ibiri n’itanu paroisse Ryakabamba ishinzwe, kuko murabizi mwese ko hari mu 1999. Imbere y’uyo mwaka, abakristu bakukira ibisata vya Ryakabamba na Bihunge baja muri paruwase Buraniro, abo ku bisata vya Gasenyi na Rwiri bakaja i Gatara, hakaba n’abandi bakristu baja ku Mubuga (nka za Mvumvu, Nyagashiru n’ahandi). Ku bisanzwe yubire ihimbazwa haciye imyaka mirongo itanu, ni na vyo mwumvise mu gisomwa ca mbere twasomewe mu gitabu ca Bene Levi.  Mwebwe iyo myaka ntimurayishikana, mugeze hagati na hagati. Kubera y’uko hari abatari bake batazoshikira iyo myaka mirongo itanu bakiriho, birakwiye ko uko imyaka mirongo ibiri n’itanu iheze hoza haraba akanya k’ugukenguruka, kandi na Ekleziya isanzwe ibitegekanya, ari na co gituma vyagiye mu kamenyero k’uguhimbaza y’ubire ya 25, ya 50, ya 75, y’100…
Ijambo Yubile risanzwe risigura impundu, inzamba y’akanyamuneza. Mu gisomwa ca mbere twasomewe mu gitabu ca Bene Levi, twumvise y’uko wari umwanya w’ukwibuka ko barokotse agacinyizo ko mu Misiri, bagafata urugendo bagana igihugu Imana c’isezerano. Guhera kuri uyo mwaka w’ukurokoka kwabo, ni ho bategekwa y’uko bazoharura iyo myaka, maze iryo sango rigeze bakavuza inzamba zibura umwaka udasanzwe, umwaka w’ikigongwe c’Imana, umwaka mweranda. Wari umwaka w’ukuzirikana agaciro k’umwidegemvyo w’ukuri, ari na co gituma vyari bitegerejwe y’uko n’uwahora aboshwe abohorwa, uwahora ari umuja akaronka ubwigenge, uwari yarangajwe agasubira iwabo mu ntara no muryango w’aho avuka, uwari yaranyazwe agatongo kiwe akagasubizwa. Ni umwaka rero wibutsa ukwisubirako, ukunagura imibano myiza mu bantu, n’abari baribagiwe bakibukwa, abahora batunzwe n’ukurya utw’abandi bakihanura mbere bagasubiza n’ivyo banyanganije. Wari kandi umwaka w’ukwibutsa y’uko Imana ari yo igaba vyose kandi ikagenza vyose ; ko iyo Mana ari yo Muvyeyi w’abarushwa. 
Muri iyi Paruwase ya Ryakabamba, uyu mwaka wa Yubire utera akamo abakristu bo mu mibano itandukanye no mu ngo zose ngo birimbure, maze umwe wese azirikane, urugero ashitseko. Ukwo kwirimbura n’ukuzirikana ni kwo gutuma umuntu abona urugero yakunzwe, ingene yagiriwe ubuntu, ingene yihanganiwe kenshi, ingene yaronse vyinshi ata kiguzi, ivyo vyose bikamutuma akenguruka. Ni vyo kandi bifasha umuntu kwisuzuma, akabona ivyo yononye, aho yigenjeje ukutari ko, ivyamwononekaranye kubera urwangara canke ukutitaho ivyo yobwirijwe. Ivyo vyose rero araheza akavyihweza, bikamutera ukumaramara n’ukwigaya, agasaba imbabazi, akifatira n’ingingo nshasha. Ivyo vyose birafasha kugarurira umutima ku Mana, abari barahunye bakinagura. Burya rero, iyo hagize n’umuntu n’umwe yisubirako akava ibuzimu akaja ibuntu, umubano wose uraharonkera akunguko, eka ndetse na paruwase yose, na Diyoseze yose, na Ekleziya yose, n’umuryango wose w’abantu iyo uva ukagera. Ni muri iyo ntumbero rero duhimbaza Yubire mu kanyamuneza kuko yugururira umuco mushasha umuryango wose w’abantu gutyo hakaba hari amapfundo apfundurutse, ya mapfundo y’umwansi shetani.
Yubire ku Banyisraeli ni umwanya w’uguhimbaza mu bukengurutsi bwose iteka ry’ugukira ubuja n’agacinyizo, abantu bakigina kubera bavuye mu gasuzuguro k’ukwama bariko baranyagwa utwabo n’ukwama bariko baracugwa bufuni na buhoro mu bikorwa vy’akavunamafyigo. Ako kanyamuneza kabwirizwa kwugurukira n’abandi bantu bose, mbere na bakavamahanga bagashikirwa, uwabuze ico yishura amadeni agatezurirwa, eka mbere n’uwuremerewe ku mutima kubera ibicumuro akaremurukwa.
Na hano muri Paruwase Ryakabamba, muravyibuka neza ko mwaciye mu mananiza menshi mu bihe vy’intambara : hari abahora batotezwa bakarara baraturatura, hari abasahurwa utwabo babona ntibaronke uwo bitura, hari abakubagurwa, hari abadodoberezwa bakicwa bazira ubusa. Ariko kandi hari abari barimenyereye mu gukora ibara, mu kwica n’ugusahura, mu gusambura, mu kwambikana ibara, n’ayandi mabi mutayobewe. Nimwibuke y’uko ivyo vyose vyari ibimenyetso vy’uko umwansi ariko arazingamika umuryango w’ab’Imana. Ubu rero, nikababere akaryo k’ukuzirikana iyo mwavuye, mukenguruke, mwihe n’imforo nshasha y’ukwinagura mu Mukama.
Kuri iri genekerezo dusanzwe duhimbarizako umusi mukuru wa Bikira Mariya aja kuramutsa Elizabeti, twifatanye na we muri ka karirimbo ka Magnificat, aho avuga ati : « Rugiravyose yangiriye ibitangaza, izina ryiwe ni ryeranda. Agirira ikigongwe abamwubaha bose, abavyeyi n’abana. Yarerekanye ububasha bw’ukuboko kwiwe, asanzaza bene umutima wishima. Yarakuye ku ngoma abiganje, yimika abatobato. Abashonje yarabahagije ivyiza, abakungu na bo abarungika zirayoye ».
Kukaba nkako, Imana ntiyigera ihimbarwa n’uko abaremanywe agashusho kayo boguma mu buja, ikiyihimbara ni uko n’abari ku muruho n’amaganya boronka agahengwe, bakikwiza agahuzu k’ubwigenge n’iteka. None rero Bavukanyi mwese, Bakristu ba Paruwase Ryakabamba, nimwame muzirikana urugero mwakunzwe n’Imana Mushoboravyose. Uwo Mukama ni we kandi ashaka ko mwoshika ku rugero rw’ukubana nk’abavandimwe. Ni yo mpanuro adushikiriza aciye ku mutumwa Paulo mw’ibaruwa yandikiye Abakolosi ati : « nimugire umutima w’ikigongwe, ukunda abandi, wicisha bugufi, utekereza, wiyumanganya. Nimwengengane, muheze murekuriranire. Nk’uko Umukama yabarekuriye, namwe mube ariko murekuriranira ». Egome cane, urukundo rw’ikigongwe ni rwo ruvura n’imitima yakomeretse, rukazamura iyazingamye, rukabohora iyabohewe mu rwanko, inzigo n’ishari. Uyu mwaka wa Yubire ntihagire n’umwe azovuga ko wamubereye impfagusa. Nubere umwe umwe wese muri mwebwe umwaka w’ukwegera Imana ukuruta, umwe wese avome mu Mushaha wa Yezu, ikigongwe c’ibicumuro hamwe n’imihezagiro iherekeza ico kigongwe, muhakure n’inguvu nshasha z’umutima n’umubiri kugira ngo muterere mu kwubaka ubwami bw’Imana, bushingiye kuri iryo bwirizwa ry’urukundo rw’ikigongwe. Umwe wese nabohoke, gutyo yugurukire n’ukubohora abandi. Amen.
 

---

Les meilleurs commentaires